O Club de lectura Pantasmas de Papel do IES Fernando Esquío é o lugar onde queremos comentar, suxerir, alentar e compartir os libros que nos gustan....Animádevos e deixade os vosos comentarios "en cualquier lengua!"

19 de junio de 2017

E sí que estivemos na X Xornada de Clubs de Lectura



Dez rapaces de 1º e 3º da ESO e unha lectora do club de lectura de adultos acompañáronnos a esta festa da lectura na X Xornada dos Clubs de Lectura. Como dicíamos no post anterior disfrutamos de encontros con autores, con outros clubs de rapaces, asistimos a obradoiros de booktubers, de programa de TV con Óscar López de Página Dos, de manga, deseño grafico, graffiti, rap, regueifas, de literatura de medo, de viaxes.... da entrega do III Premio dos Clubs de Lectura a Miguelanxo Prado, unha xornada de calor asfixiante e frescor coa temática de Somérxete!!!. 
Non deixaremos de agradecer á Asesoría de Bibliotecas, o CAFI e Consellería de Educación tan boa organización e tanto que ver e apreciar.

Moitas grazas

Velaquí algúns exemplos da difusión que tivo esta xornada na prensa e nas redes sociais:

14 de junio de 2017

X Xornada dos Clubs de Lectura no que o noso club tamén estará




O 17 de xuño, en Compostela, celebrarase unha gran "quedada lectora" de integrantes dos clubs de lectura dos centros de ensino secundario de Galicia. 
Unha boa representación dos preto de 11.000 lectores e lectoras que, de forma periódica, se xuntan para compatir experiencia arredor dos libros e da lectura polos institutos e outros centros de ensino galegos, terán a oportunidade, xunto co profesorado que coordina estes clubs, de atoparse, compartir lecturas, experiencias e un importante número de actividades en compañía de autores.
Pedro Feijoo, Marcos Calveiro, Ledicia Costas, Carlos Negro, Rosalía Fernández Rial, Suso Fraga, Andrea Maceiras, Rosa Aneiros, Miguelanxo Prado, María Reimóndez, Miguel Anxo Fernández, Antón Riveiro Coello, Antía Otero, Xosé Tomás, Fran Alonso, Berta Dávila, Tamara Andrés e Francisco Castro
Entre outros participantes nesta X Xornada dos Clubs de Lectura, Óscar López, xornalista cultural (Página 2), ou Luís Pardo (cadena Ser); críticos como Ramón Nicolás ou Montse Pena Presas; expertos do mundo da dobraxe (Anxos Ferradáns) e do cine (Jorge Coira) ou narradoras, como Soledad Felloza,  compartirán coas lectoras e os lectores o seu tempo e as súas experiencias. 
As regueifas, o rap, o graffiti tamén estarán presentes, así como o teatro, o circo e a música tradicional galega (Xabier Díaz & Adufeiras de Salitre). Haberá sesións específicas para profesorado que coordina os clubs de lectura, con Inés Miret e Mercedes Queixas. 
O final literario correrá a cargo de César MallorquíPremio Nacional de Literatura Infantil y Juvenil 2013 e Premio Cervantes Chico 2015 a toda a súa obra xuvenil,  un dos autores en lingua castelá máis lidos polos clubs de lectura ano tras ano.
Unha grande celebración co gallo dos dez anos continuados da iniciativa CLUBS DE LECTURA nos centros de ensino secundario de Galicia, dentro do programa HORA DE LER para o fomento da lectura no ámbito educativo.

Norabóa a todos os centros e á Asesoría de Bibliotecas Escolares de Galicia 
por propiciar esta marabillosa aventura!


Ver o programa

4 de junio de 2017

Visita á Semana do Libro en Santiago de Compostela



O pasado venres invitáronnos á Feira do Libro en Santiago de Compostela, a razón foi o 25º aniversario da publicación de O enigma de Embívicus de José Antonio Perozo. Xuntámonos algúns dos membros do club de lectura de 1º e 2º da ESO cos lectores na época da súa saída ao mundo da literatura xuvenil e o mesmo autor.
Unha experiencia apaixoante porque tres dos nosos alumnos puideron participar como portavoces do grupo na rolda de conversa co autor e o editor Francisco Castro, director da editorial Galaxia á que temos que agradecer a experiencia e o convite.
Tamén tivemos o pracer de falar con David Cortizo da editorial Urco que nos explicou o nacemento da editorial os fondos que foron publicando e mesmo nos fixo unhas recomendacións que xa lle encargamos coa promesa de que nos ía traer algún autor para o curso que ven.
Logo de dar un paseo polo salón, mercar algún libro, non podía ser doutro xeito, fixemos unha escapada polo casco vello da cidade para visitar a biblioteca da Facultade de Xeografía e Historia, unha delicia aínda que como había moita xente estudando non puidemos revolver moito.
Esperamos que o pasaran ben e disfrutaran da experiencia.

16 de mayo de 2017

Homenaxe a Carlos Casares: Vento Ferido


Carlos Casares Mouriño naceu no ano 1941 en Ourense, pero ao pouco tempo a familia estableceuse en Xinzo de Limia, onde seu pai tomara praza de mestre. Tanto Ourense como Xinzo deixarían unha fonda pegada na súa obra.
Comezou a súa carreira literaria moi novo, publicando en 1965 os seus primeiros relatos na revista Grial, da editorial Galaxia.
Casares foi colaborador habitual na prensa galega, e a súa traxectoria foi adornada con diversos premios que recoñeceron a importancia da súa obra e a súa influencia na literatura galega.

Nos distintos contos que forman Vento Ferido móstranse diferentes temáticas: a infancia perdida, o desamor, a soidade da vellez, a crueldade dos nenos, a violencia, a monotonía ou a fatalidade do destino.

"Por moito que intentemos escapar do pasado, dun xeito ou outro, este sempre volve a nós. Isto é o que lle ocorre a Milo, un rapaz de 23 anos que debe regresar á súa vila natal anos despois de escapar dela. Á súa volta descubrirá que tivo motivos máis que suficientes para marchar, e o que parecía un grato reencontro coa familia e os amigos, convertirase nun día que xamais esquecerá, no que as fantasmas do pasado non pasarán desapercibidas."

19 de abril de 2017

Cabalos e lobos

Cabalos e lobos (Xerais) é o título do debú literario de Fran P. Lorenzo (Vigo, 1973). Esta novela gañou o Premio Blanco Amor 2014 e converteuse nun dos libros máis vendidos do ano. Nesta entrevista conversamos co autor sobre os fíos que compoñen unha historia que Lorenzo conta a medias como ficción a medias como crónica, íntima e histórica, do Vigo do século XX.

Vigo. Setembro de 1972. Paula acaba de atravesar unha cidade tomada pola policía franquista e colapsada pola folga. Na súa casa, no alto do edificio de Gran Vía nº 2, agárdaa unha revelación. Ten quince anos e acaba de decatarse de que non coñece a súa nai, a herdeira dunha influente estirpe de empresarios alemáns asentados no porto vigués a finais da I Guerra Mundial. O que ela descobre esa tarde é o primeiro segredo dunha rede de mentiras e silencios que, xa no presente, se verá obrigada a destecer para o seu fillo. Nese relato achará as claves de quen é a súa familia. Un colar de rubís, unha carta sen resposta, un país bombardeado, trens que parten cara ao frío e, sobre todo e contra todo, o amor prohibido que unirá de por vida o seu tío Álvaro co inquietante Bruno. Cabalos e lobos, a primeira e magnífica novela do xornalista Fran P. Lorenzo, é o retrato íntimo da historia dun século marcado pola guerra, o totalitarismo e a barbarie. Unha fotografía, con Vigo ao fondo, do combate individual que os seus protagonistas libran por aquilo que desexan, nese preciso lugar en que a cidade se funde cos seus soños.